LAOAG CITY – Kinumpirmaran ni Police Major Rommel Ramos, hepe ti PNP-Traffic Division a simmaruno a pimmusay ti maysa pay kadagiti biktima ti desgrasya idiay Barangay Darayday ditoy ciudad.
Segun kenni Ramos, naggapo iti maysa nga okasyon dagiti biktima a da Santiago Martinez Jr. ken Clark Joefers Ramos ken idi agawid dan ket ditoy a dimmungpar da iti agat-atras a container van rason ti insidente.
Inlawlawag ni Ramos nga idi nakita dagiti kakadwa ti driver ti container van a ni Edwin Romero Jr. dagiti biktima a nakamotorsiklo ket nagsenyas da usar ti silaw ti cellphone ngem nagtultuloy dagiti biktima.
Dagus a naitaray dagiti biktima iti ospital ngem naideklara a dead on arrival ni Martinez idinto a ni Ramos a lubbon na ket pimmusay itay alas-tres ti parbangon.
Iti agdama ket saan da pay a makasarita ti driver ti container van a ni Romero gapo iti pannakakigtot na iti pasamak.
Naamoan nga awan ti suot nga helmet dagiti biktima idi mapasamak ti insidente ken posible nga adda ii impluwensya ti nasanger.
