LAOAG CITY – Dua ti nasugatan iti napasamak a pammaltog iti paset ti Barangay Binsang, Pasuquin, Ilocos Norte.
Nabigbig dagitoy a da John Lord Abion, agtawen ti 32, vendor ken ni Herman Acoba, agtawen ti 21, agpada a baro ken residente ti nasao a barangay.
Segun ti inisyal nga imbestigasyon, bayat ti panagawid dagiti biktima a nakalugan ti motorsiklo manipod iti Barangay Pasciocan iti ili a Bacarra ket kellaat lattan a pinaltu-paltugan ida dagiti riding-in tandem suspects apaman a nakadanun da iti Barangay Binsang iti ili a Pasuquin.
Naamoan a namin-innem a daras a pinaputukan dagiti suspek dagiti biktima a nakatamaan ti akin-kannigid a patong ni Abrion idinto a natamaan met ti akin-kannigid a luppo ni Acuba.
Naitaray dagiti biktima iti Governor Roque Ablan Senior Memorial Hospital (GRASMH) ditoy ciudad ti Laoag para ti naan-anay a pannakataming da.
Kabayatanna, inbatad ti saanen a nagpabigbig a kabsat ni Abrion a basar ti naidanun kadakuada nga impormasyon ket nakagitgitan dagiti biktima dagiti suspek ken mabalin a nakasuron dagitoy isut gapuna a pinaltugan da ida babaen ti maipagarop a kalibre 45 a paltog.
Iti agdama, agtultuloy ti imbestigasyon dagiti otoridad seknan ti napasamak a pammaltog.
