LAOAG CITY – Pimmusay dagiti dua a lallaki iti maipagarup nga enkwentro dagiti otoridad ken maipagarup nga armado a lallaki iti Brgy. Arua-ay iti ili ti Piddig.
Segun kenni Barangay Chairman Rolex Mariano, iti nasao a barangay, umabot iti 19 a putok ti paltog iti nangegan da, no sadinno nga immuna ti tallo ken simmaruno dagiti nagsasaruno a panagputok ti paltog.
Kuna na a maipagarup nga adda dagiti nag-iinom a tattao a saan a nabigbig iti maysa a tianggi iti Brgy. Ab-abut.
Idi ta adda ti nagresponde a patrol ti pulis ket nakita da dagiti otoridad, nagtaray dagitoy a napan iti likod ti tianggi ken maipagarup nga adda ti as-asuten da.
Inbatad ni Mariano babaen iti pannakisarita na ket saan da nga ammo dagiti dua a lallaki.
Adda ti napan iti waig iti masakopan na a barangay ket dita a napasamak ti nagsasaruno a panagputok ti paltog.
Iti sabali a bangir, inbatad ni Police Col. Cristopher Abrahano, provincial dorector ti Ilocos Norte Police Provincial Office a ti naawat na a report manipud iti maysa a residente iti Brgy. Arua-ay gapu kadagiti mapagatapan a lallaki.
Kuna na nga idi nakita da dagiti otoridad ket nagtataray dagiti maseknan ken nabati da pay ti motorsiklo da.
Inbatad ni Abrahano a kinamat met dagiti otoridad dagiti maseknan agingga a nakorner da iti Brgy. Arua-ay ken dita a napasamak ti panagsinnukat ti putok.
Iti mainaig a damag, inpakaammo ni Police Col. Abrahano, nga agtultuloy pay laeng ti imbestigasyon.
Kuna na a dua a banag ti kitkitaen da no sadino ti umuna ket maipagarup a gun for hire ti nakaengkwentro dagiti otoridad ken ti maikadua ket possible a masolbar ti maysa a kaso ti attempted murder iti ili ti Piddig, sumagmamanon a lawas ti napalabas.
Inbatad ni Abrahano a ti napasamak iti kallabes ket adda ti gandat a patayen dagiti suspek ngem saan da a nagballaigi kalpasan a saan a nagputok ti paltog dagitoy.
Inlawlawag na nga idi agsubli dagiti suspek ket dita nga adda ti nagtawag tapno agresponde dagiti otoridad ken dita a napasamak ti pammaltog a poon ti nakatayan dagitoy.
Innayon ni Abrahano nga adda ti maysa a pulis a nasugatan ti ima na ngem saan a nakaro daytoy.
Kabayatanna, narekobre dagiti kameng ti Scene of the Crime Operatives dagiti dua a caliber 38 revolver no sadino a naiputok dagiti tallo a bala iti maysa a paltog ken maysa met a bala ti nausar iti sabali pay a kalibre 38 a paltog.
