LAOAG CITY – Naladingit ti gobyerno probinsyal a nangipakaammo nga adda ti dua a pasyente a pimmusay gapu iti covid-19.
Daytoy ket ti maika-18 ken maika-19 a pimmusay.
Binigbig ti gobyerno probinsyal dagiti pimmusay a pasyente a da IN-C1816, lakay, agtawen ti 86, residente iti Brgy. 13 San Eugenio iti ili ti San Nicolas kenni IN-C2008, lalaki, agtawen ti 51, empleyado iti gobyerno probinsyal, residente iti Brgy. 6 San Agustion ditoy siudad ti Laoag ken nakapulapol idi ni IN-C1894.
Gapu iti daytoy, umaboten iti 19 ti bilang dagiti pummusay gapu iti nasao a virus.
Maipalagip a nakumpirmaran a nagpositibo iti COVID-19 ni IN-C1816 idi Abril 28 ita a tawen idinto ni IN-C2008 ket nagpositibo met idi Mayo 6 ita a tawen.
Iti mainaig a damag, maysa ti nainayun iti bilang dagiti nalaingan manipud iti covid-19 rason nga umabot iti 1638 ti total recoveries.
Naimaldit met ti gobyerno probinsyal iti siyam a nagpositibo rason nga agdagupen iti 2081 ti kaso idinto nga 424 ti aktibo a kaso.
Manipud kadagiti nagpositibo idi kalman, uppat dagiti nagpositibo iti COVID-19 iti siudad ti Batac, sagdudua iti ili ti Adams ken ditoy siudad ti Laoag ken maysa iti Brgy. Burayoc iti ili ti Pagudpud.
Nagtalinaed a ti ditoy siudad ti kaaduan ti aktibo a kaso ti covid-19 nga umabot iti 148 a kaso, sumaruno iti il ti San Nicolas nga addaan iti 62 nga aktibo a kaso, 50 iti ili ti Bacarra, 36 iti ili ti Dingras ken 34 iti siudad ti Batac.
