LAOAG CITY – Natiliw dagiti dua nga indibidual idinto a nakalibas dagiti tallo a kakadwa da iti naisayangkat nga anti-illegal gambling operation iti paset ti Brgy. 34, Isic-Isic iti ili ti Vintar.
Nabigbig dagiti natiliw nga isuda Peejay Acacio y Gamioa, agtawen ti 34, awanan ti asawa, residente iti nadakamat a barangay ken ni Lionell Galvizo y Vea, agtawen ti 36, awanan ti asawa ken residente iti Brgy. Dagupan iti ili ti Vintar.
Kabayatanna, nabigbig met dagiti nakalibas nga isuda alyas ”Nonoy Acacio”, Rio Gapusan, ken ni Lito Tagodan, agpapada a residente iti Brgy. Cabangaran iti li ti Vintar.
Basar iti report, nakaawat ti report ti Philippine National Police seknan iti maipagarop a kaadda ti agsusugal iti maysa a minatayan iti Barangay Isic-Isic.
Iti panagresponde dagiti otoridad ket ditoy a naaktwan da dagiti suspek nga agay-ayam ti “Lucky 9”.
Nakumpiskar dagiti otoridad iti lugar ti 52 a pedaso ti baraha, maysa a plastic a lamisaan, maysa a table cloth, 11 a plastic a tugar, maysa a 500 peso bill, 12 a pedaso a 100 peso bill, 1 a pedaso ti 200 peso bill, 5 a 50 peso bill, 20 peso billa ken barya a 100 a pisos.
Umabot met ti 3,624 a pisos ti nakumpiskar dagiti otoridad a mapapati a pusta dagiti suspek.
