LAOAG CITY – Naluksaw da Mrs. Melanie Darang ken ti asawa na iti Brgy. Sta. Maria ditoy siudad ti Laoag kalpasan a natay dagiti dua a taraken da a baka gapu ti pannakakimat dagitoy idi malem ti Martes.
Kuna na a dua a lallaki dagiti nakimat a baka na ken agdagup ti 92 a ribo a pisos ti balur da.
Inbatad ni Darang a ti maysa a baka na ket agbalur ti 42 a ribo a pisos ken ti maysa pay a baka ket agbalur ti 50 a ribo a pisos.
Segun kenni Darang, immay ti maysa a karruba na tapno ipakaammo na ti pannakakimat ti maysa a baka na.
Idi nagtalinaay ti sitwasyon idi malem ti Martes, napan da kinita ti nasao a baka a nagmaris ti brown ken naduktalan pay a nairaman a nakimat ti kaabay na a baka a nagmaris ti puraw.
Inlawlawag na a nakaiyapon dagiti baka a pataraken da iti sirok ti kayo ken addaan da ti pasobre.
Inadmitir ni Mrs. Darang nga inbilin dagiti panglakayen da iti lugar da ti pannakaparti laengen iti baet nga adda ti plano a mangpaayab ti backhoe tapno kuma maikali dagiti nakimat a baka.
Gapu iti luksaw da nga agasawa ket, nakaammon ti mangtartaraken kadagiti baka iti panagpauraga da kalpasan a naparti daytoy.
Naamuan a damo laeng a napasamak ti panagkimat nga adda ti natamaan iti nasao a barangay.
