LAOAG CITY – Natiliw kalpasan ti naisayangkat a buy bust operation ti PNP-laoag dagiti dua a lallaki iti compound ti Marcos Stadium Bgy. 3 ditoy ciudad ti Laoag.
Binigbig ni SPO3 Harold Nicolas, Hepe ti Intelligence Div. dagiti natiliw a da John Marck Ignacio agtawen ti 18, estudyante ti INNHS, agkaskasera iti asideg ti BJMP, tubo iti Isabela ken ni Jayfred Bumanglag , agtawen ti 18 out of school youth ken residente ti Bgy. 2 ditoy ciudad ti laoag.
Segun ken ni Nicolas, naala da iti ikot dagiti suspek ti maysa a sachet a naglaon iti napagango a bulong ti marijuana ken ti 500 a pisos a buy bust money.
Kuna na a nabayagen a sipsiputan da dagiti dua gapu ta idi pay 2016 a monmonituren da ngem ita laeng a nagbanag.
Innayon na a maibilang dagiti dua nga adda iti street level category.
Kabayatan na, naiget met a naglikudan da Ignacio ken Bumanglag a kukua da ti naala kadakuada ken saanda nga agus-usar ti maipawil a droga.
