LAOAG CITY – Kinumpirmaran ni Police Chief Inspector Joseph Baltazar, ti chief of police iti ili Vintar ti pannakatiliw da ti dua a lallaki a nagpammarang a doktor iti inyuswat da nga entrapment operation iti Barangay 2, San Nicolas ti nasao nga ili.
Binigbig na dagitoy a da Rodrigo Cañavera, agtawen iti 38, naasawaan, residente iti Barangay Bubon iti ili a Burgos ken ni Arnel Valdez, agtawen iti 52, naasawaan ken residente met iti Barangay 2, San Nicolas iti ili a Vintar.
Segun ken ni Baltazar, ti nagbalin a biktima dagiti suspek ket ni Mrs. Salinar Neria Yoshida y Malsig, residente met laeng iti nasao a barangay.
Inlawlawag na a ni Yoshida ket dagiti nga agtrabtrabaho idiay Japan ngem nagawid ditoy pagilyan kalpasan a naparalisado iti nasao a pagilyan.
Kuna ni Baltazar, inyam-ammo ni Valdez ni Cañavera ken ni Yoshida kas maysa a physical therapy kagiddan ti panangidiaya dagiti maseknan ti nagduduma nga agas ken inpasigurado da nga agimbag daytoy.
Inpakaammo ni Baltazar nga umaboten iti 60 a ribo a pisos ti naibayad ni Yoshida kadagiti dua ken inkari dagiti suspek nga aglaing ti biktima apaman matumar nanton dagiti agas nga agbalor iti 800 a ribo a pisos.
Inbatad ni Baltazar a dagiti nagduduma ti klase na nga agas a pakairamanan dagiti tabletas ken liquid ket awan iti label na isut gapuna nga inpaberipikar ti pamilya ti biktima.
Innayon ti opisyal nga umabot iti agarop makabolan a sinipsiputan da dagiti suspek ken idi naipakaammo kadakuada ti panagsubli da manen iti balay ni Yoshida ket nangiyuswat dan iti operasyon.
Nakumpiskar da iti ikot dagiti suspek dagiti naruay a nagduduma nga agas nga agpapada nga awan ti label na, 10 ribo a pisos ken cellphone.
Iti agdama, kuna ni Baltazar a maysa kadagiti isagsagana da a kaso nga ipila da kontra kadagiti suspek ket ti estafa idinto a dagiti dadduma a kaso a mabalin da nga ipila ken ad-adalen da pay laeng.
