LAOAG CITY – Nasugatan dagiti dua a lallaki kalpasan a nagtinnagbat da gapo iti maipagarop a pinag-pinnalastog da iti nagbalin a karelasyon da idiay Barangay 15, Baligat idiay ciudad ti Batac.
Binigbig ni Police Chief Inspector Eddie Suyat, ti dupety chief of police ti PNP-Batac dagitoy a da Jerry Espirito ken Jonnel dela Cruz, agpada a naasawaan ken residente iti nasao a barangay.
Segun kenni Suyat, agii-inom dagiti dua kadwa da ti agnagan ti Rogelio Camalig idi napagsasaritaan da dagti nagbalin a karelasyon da iti kallabes.
Iti imbestigasyon dagiti otoridad, maipagarop a nagpinnalastog da no siasinno ti ad-ado ti nakarelasyon na a babai idi nakapungtot ni Espirito.
Gapo iti daytoy, kuna ni Suyat a napan nangala ti buneg ni Espirito ken ipalapal na kenni Dela Cruz a rason ti nakataam ti akin-kannigid a saka na.
Naamoan a bimmales ni Dela Cruz ket pinidot na ti buneg ken intagbat na kenni Espirito a nakasugatan met ti likod ti ulo na.
Iti agdama ket adda iti ospital ni Espirito idinto a ni Dela Cruz ket adda iti kustudiyar ti PNP-Batac.
Innayon ni Suyat a no saan a makapagsarita ti nasayaat dagiti dua ket ipila da ti kaso iti piskalya ken ni Dela Cruz ti agbalin a suspek gapo iti nakana a sinagaba ni Espirito.
