LAOAG CITY – Kinumpirmaran ni Vice Mayor Pedro Rex Aguinaldo iti Pasuquin, Ilocos Norte nga adda ti dua a mangngalap iti Barangay Davila a mapukpukaw.
Daytoy ket kalpasan a nagbaliktad ti nagluganan da a bangka bayat ti papanda koma panagipakat ti rama da iti baybay.
Binigbig ti bise mayor ti maysa kadagiti biktima a ni Edward Letin ken ti uliteg na a saan pay a nabigbig ti kinasiasinno na.
Segun ken ni Aguinaldo, adda dagiti nakakita ti panagbaliktad ti bangka, ken ginandat dagiti maseknan nga otoridad ti napan mangrescue koma kadagiti biktima ngem nagsubli da gapu ta saan da a kabaelan ti kinadawel ti baybay.
Mangnamnam ti bise mayor a makasubli met laeng a sibibiag dagiti aguliteg a biktima.
Kabayatanna, inbatad ni bise mayor Aguinaldo nga awan pay ti naidandanun kenkuana seknan ti maipagarop a kaadda manen ti fishing vessel nga agkalkalap iti baybay a sakop iti ili da.
