LAOAG CITY – Tinagtagbat ti maysa nga indibidual a nabartek ti dua nga agpagayam a manarimaan laeng nga agin-inana iti sirok ti kayo ti chico iti Barangay Manalpac iti ili ti Solsona.
Segun ken ni P/Maj. Chris Anthony Sorsano, Hepe ti Solsona Municipal Police Station, nabigbig ti dua a biktima nga isuda Efren Ganotisi, agtawen ti 39, naasawaan ken construction worker, Jonathan Tabrilla, agtawen ti 41, naasawaan ken construction worker idinto a ti suspek ket ni Mike Tabrilla, agtawen ti 40, awanan asawa ken mannalon nga agpapada amin dagitoy a residente ti Barangay Manalpac iti nasao nga ili.
Inbatadna a basar iti inwayatda nga imbestigasion, kabayatan nga agin-inana iti sirok ti kayo ti chico ti dua a biktima ket kellaat lattan a tinagtagbat isuda ti suspek.
Gapu iti daytoy, kuna ni P/Maj. Sorsano a nagsagaba ti sugat iti akinkannawan ken akinkannigid nga ima ni Jonathan idinto a nagsagaba ti sugat iti nagduduma a paset ti bagi ni Efren a nairamraman laeng iti insidente.
Inlawlawagna nga adda ti dati a susik iti nagbaetan da Jonathan ken Mike gapu ta maipagarup a mapan agal-ala ti biktima ti ikan iti fishpond a banbantayan ti suspek a saan nga agpakpakada daytoy kenkuana.
Mainaig iti daytoy, narekobre dagiti otoridad ti buneng a nausar iti krimen nga agatiddog ti sangapulo a pulgada.
Naammoan nga in-turn over dagiti barangay officials ti suspek iti kuerpo ti pulisia.
Kabayatanna, sumango ti suspek iti kaso a Frustrated Murder.
