LAOAG CITY – Napilaanen ti kaso a robbery ken panagsalungasing iti Republic Act No. 9165 wenno ti Comprehensive Dangerous Drugs Act of 2002 ti suspek nga agtawen 19 a kameng ti LGBTQ+ kalpasan a nagtakaw ken adda ti pakanaiganna iti illegal a droga babaen ti Hot Pursuit Operation iti Sitio 2 ti Brgy. 2 Sta. Juaquina ditoy siudad ti Laoag idi Setiembre 6, 2024.
Inpakaammo ni P/Staff Sergeant Samoir Bellarmino ti Philippine National Police ditoy siudad.
Innayonna a dati nataliwen ti suspek nga agtawen 19 gapu iti illegal a drogra.
Maipalagip a natiliw ti Philippine National Police ditoy siudad dagiti dua nga agtutubo a kameng ti LGBTQ+ nga agtawen 19 ken 15 kalpasan a nagtakawda ken pakanaiganda iti illegal a droga iti nadakamat a lugar.
Natiliw dagiti suspek kalpasan a nakikooperar dagiti kameng ti Philippine National Police ditoy ciudad iti akin kukua iti Bricks Inn Hotel kalpasan a na-tract dagiti otoridad ti selpon a maipagarup a tinakaw dagiti suspek ken iti Closed-circuit television ti North’s Guest House.
Nakumpiskar manipud kadagiti suspek ti maysa a small heat transparent plastic sachet a naglaon ti shabu nga agdagsen iti 0.8 grams ken agbalor ti P5,440 pakairaman dagiti 2 a selpon, black a bag a naglaon iti personal belongings, 3 a selpon ken dua a wallet a tinakadawda, ken maysa a wallet a naglaon ti shabu.
