LAOAG CITY – Naarestar dagiti dua nga akusado babaen ti bileg ti warrant of arrest nga inyimplementar ti Ilocos Norte Police Mobile Force Company (INPMFC), PNP Pasuquin ken PNP Laoag iti dua a barangay iti ili ti Pasuquin.
Nabigbig dagiti akusado nga isuda Reinhard Caliva u Dela Cruz, agtawen ti 33, addaan ti live-in partner ken residente iti Brgy. Susugaen iti nasao nga ili idinto a ti maysa ket ni Mariano Badjong y Alega, agtawen ti 62, awanan asawa, tubo ti ili ti Pinili ngem agdama nga agnanaed iti Brgy. 7 Caruan, Pasuquin.
Segun ken ni PLt. Col. Mar Louise Bondoc, mangidadaulo ti INPMFC, naarestar ti Dela Cruz gapu iti panagsalungasing na iti section 77 ti PD 705 wenno ti Forestry Reform Code of the Philippines ken ti RA 9175 wenno Chainsaw Law of 2002 idinto a panagsalungasing met laeng iti PD 705 ti makaigapu ti pannaka-arestar ni Alega.
Nu pay kasta, dagus a nawaya-wayaan dagiti akusado kalpasan a nakapagpiyansa ni Dela Cruz iti 48 a ribo a pisos idinto nga 40 a ribo a pisos kenni Alega.
Kabayatanna, ti warrant of arrest ket inparuk-at ni Hon. Judge Felix G. Salvador, acting Presiding judge ti RTC FJR branch 19 iti ili ti Bangui.
