LAOAG CITY – Kinumpirmaran ni Police Lieutenant Colonel Roger Digmayo, ti Chief of Police ti PNP Batac a nasapgud ti maysa nga ambulansia iti ili ti Badoc ti kapadana met laeng nga ambulansia iti Siudad ti Batac iti paset ti sangoanan ti Bulwagan a sakupen ti Brgy. Quiling Norte iti nasao a Siudad.
Segun kenkuana, apaman a sumrek koman ti ambulansia iti Siudad ti Batac iti stasyon a pagpapaayanna ket kellaat lattan a nasapgud daytoy ti ambulansia ti Badoc.
Inlawlawagna a dagiti dua nga ambulansia ket agsinsinnarunoda nga agturong iti amianan a direksion.
Gapu iti daytoy, inbatadna a naparpar ti akinkannawan a sango ti ambulansia ti Badoc idinto nadadael met ti likudan ti ambulansia iti Siudad ti Batac.
No pay kasta, kinunana a saan met a nagsagaba iti aniaman a sugat dagiti dua a driver ti ambulansia ken saan met a naan-ano ti pasiente a nakalugan iti ambulansia ti Badoc.
Naammoan nga awan met ti pasiente iti uneg ti ambulansia iti Siudad ti Batac kadayta a gundaway.
Kabayatanna, inpakaammo ni Police Corporal Romeo Bartolome Jr., Imbestigador iti nasao a desgrasia a dagus met laeng a naginnareglo dagiti agsinnungbangir a partido.
