LAOAG CITY – Insalakan dagiti dua nga aso ti amo da a lakay a naatake iti uneg ti pagtaengan na iti Brgy. 20 iti ili a San Nicolas.
Nabigbig daytoy a ni Mr. Pio Abrenica, agtawen ti 67, maymaysa nga agnanaed gapu ta adda iti ballasiw-taaw ti asawa ken dagiti annak na.
Segun iti kaanakan na a ni Johnsen Cristobal, maysa a tawenen a kadkadwa ni Abrenica ti aso na a Labrador ken 6 a bulan met ti askal.
Kunana a saan a makarwar dagiti aso gapu ta nakagalot dagitoy malaksid iti askal.
Inbatad pay ni Cristobal a tinulungan ti askal ti labrador tapno makaruk-at sakbay da a napan iti balay ti karruba tapno agpatulong.
Patien ni Cristobal a linagto ti askal ti alad da gapu ta kanayon a nakarikep ti gate ti nasao a pagtaengan.
Kalpasan daytoy ket nagturong dagiti aso iti karruba da babaen iti panagtaol da rason a napan na intulnog dagitoy iti pagtaengan ni Abrenica ket ditoy a nakita na a nakadasay.
Innayon na a nga adda iti dati a taraken nga aso ni Abrenica nga inay-aywanan ti 12 a tawen.
Iti agdama ket nagtalinaed iti ospital idiay ciudad ti Batac ti nasao a lakay.
