LAOAG CITY – Pinatiketan ni Barangay Chairman Joseph Bitagon iti Barangay Balatong ditoy ciudad ti Laoag dagiti dua a lallaki nga agpapaay iti maysa a telecommunication company ditoy ciudad.
Daytoy ket kalpasan nga inpilit da ti simrek iti maysa a balay nga addaan ti covid-19 patient.
Segun kenni Bitagon, napan dagiti dua a lallaki iti nasao a lugar ken nagpakada a sumrek da iti pagtaengan ngem gapo iti sitwasyon ket saan nga inpalubos ti kapitan.
Kunana a kalpasan nga inparit na a sumrek dagiti dua nga indibidual ket pimmanaw dagiti dua iti nasao a lugar.
Nupay kasta, kalpasan ti agarop lima a minutos ket nagsubli dagiti dua a lallaki ken idi insardeng da ti nagluganan da iti saan a makita dagiti agbanbantay ket nagderetso da lattan a simrek iti balay.
Kalpasan met a naitawag iti kapitan ti napasamak ket dagus a nagresponde ti kapitan ken basar iti palawag dagiti maseknan, tinawagan isuda ti agtagikua iti balay tapno tarimaanen ti internet connection.
Inadmitir ti kapitan a nakapungtot gapo ta iti laksid a pinawilan na dagiti maseknan ket nangaramid latta ti wagas dagitoy tapno makastrek.
Gapo iti daytoy, timmawag ni Bitagon iti PNP-Laoag ken inbilin na ti pannaka-ticket dagiti dua nga indibidual ken tapno saanen a maulit daytoy.
