LAOAG CITY – Ballaigi a natiliw ti dua nga idibidual babaen ti insayangkat a drug buy bust operation dagiti kameng ti Philippine National Police ditoy ciudad ti Laoag.
Naarestar dagiti dua iti daya a paset ti Ilocos Norte College of Arts and Trade (INCAT).
Nabigbig dagiti suspek nga isuda Felino Gubak Pascual Jr. agtawen ti 41, addaan ti walo nga anak, ken agtrabtrabaho iti laod ti Northwestern University, ken ni Mark Anthony Balantac dela Cruz, agtawen ti 19 agpada a residente iti Lapaz, ditoy ciuad ti Laoag.
Iti naisayangkat a drug buy bust operation, nakumpiskar dagiti otoridad ti maysa a keypad a cellphone, maysa a karton ti posporo a naglaon ti 2 a sachet ti mapapapati a shabu ken maysa a heat sealed shabu, calibre 38 a paltog, tallo a bala ti nasao a paltog, kutsilyo, vape, kurong-kurong, ken maysa a pitaka a naglaon P2,309 a kuarta.
Mainaig iti daytoy, naglikodan dagiti suspek a kukua da dagiti nakumpiskar no sadinno nga inpetteng da a naimula laeng dagitoy.
Inlawlawag ni Pascual a napan da gimmatang ti kalding iti Barangay Barabar ili ti San Nicolas iti maysa a tao a saan na nga am-ammo nga indibidual ken ilako da kuma met laeng ngem saan dan a nagtuloy ken nagdesisyon da nga agawid lattan ngem maipagarop nga adda nangsada kadakuada a naka-sibilyan iti laud ti Northwestern University, paset ti bypass road.
Inbatad da nga uppat a nakasibilyan ti nangsada kadakuada ken maipagarop a dagitoy ti gumatang iti lako da a kalding.
Nupay kasta, kunada a ditoy a maipagarop nga inabungotan da isuda, pinosasan, inlugan ken inserrekda ida iti maysa a kuarto ken inakusaran na dagitoy a nangipabulsa ti mapapapati a shabu ken ti nadakamat a paltog.
Inpetteng met ni Dela Cruz a pitaka laeng ti adda iti bulsa na ken awan ti aniaman a pakainaigan da iti iligal a droga.
Kabayatanna, nagtalinaed met iti kustudiyar dagiti otoridad dagiti dua nga indibidual.
