LAOAG CITY – Inpakaammo ni Dr. Loida Valenzuela, ti mangidadaulo iti provincial veterinarian office a dua pay laeng nga ili ditoy probinsya ti mabalin nga agtaraken ti baboy wenno dagiti adda iti babaen ti yellow zone.
Daytoy ket iti ili ti Pagudpud ken Adams a karaman a naapektaran ti African swine fever iti kallabes.
Kuna ni Velenzuela a dagiti nadakamat nga ili ket isu ti adda iti babaen ti yellow zone a kayat na sawen ket mabalinen ti panagtaraken ti baboy.
Mainaig iti daytoy, inbatad na nga adda iti babaen ti pink zone iti nabatbati a paset ti probinsya nu sadino a ditoy met a dagiti pay laeng sentinel pigs ti mataraken.
Inlawlawag na a dagiti mataraken a sentinel pigs ket maobserbaran ken maipadalan iti testing ti dara da kalpasan ti 40 nga aldaw tapno maamoan nu adda pay laeng ti virus a posible a makaapektar kadagitoy.
Inbatad na a nu makapasa dagiti baboy ket dita a mabalin a maipan iti babaen ti yellow zone dagiti nabatbati a lugar ditoy probinsya ken maisubli ti panagtaraken ti baboy.
Kabayatanna, inpakaammo ni Valenzuela a ti laengen ili ti Banna, Piddig ken Bangui ti saan pay a nakaisubmitir iti dokumento para iti sentinel pigs.
Nu pay kasta, kuna na a manamnama a makitaripnong kadagiti municipal agriculturist ken city veterinarians iti umay a lawas para iti panagsasagana ti probinsya a maipan iti babaen ti yellow zone.
