LAOAG CITY – Inbatad ni Senador Risa Hontiveros nga adda ti posibilidad a mangiyuswat ti Senado ti dua nga agsina nga impeachment trial no magna iti kamara de representantes dagiti reklamo nga impeachment kontra kada Presidente Ferdinand “Bongbong” Marcos Jr. ken Vice President Sara Duterte.
Inadmitir ni Hontiveros a saan na pay nabasa ti reklamo kontra iti presidente, ngem nakasagana a mangannong ti responsibilidad na kas senator-judge no umuli daytoy iti Senado.
Kuna na a saan man nga ideal ti maaddaan ti dua nga aggiddan nga impeachment trial, trabaho paylaeng ti Senado a ti siguradwen ti pagsungsungbatan dagiti opisyal ti gobyerno.
Innayon na a no naurnus ken nainkalintegan a masolbar dagiti kaso, mabalin a makatulong iti panagdur-as ti pagilian.
Maipalagip nga idi lunes, Enero 19 ket naipila iti kamara de representantes ti impeachment complaint kontra ken ni Presidente Marcos.
Possible met a maipila manen ti baro a reklamo kontra kenni Bise Presidente Duterte intono Pebrero, kalpasan ti maysa a tawen a pannakaipawil gapu iti immuna nga impeachment case kontra kenkuana.
