LAOAG CITY – Nagtalinaed iti kustudiyar ti PNP-Batac dagiti dua nga indibidual a natiliw iti naiyuswat a gun buy bust operation idi kalman iti Barangay San Pedro iti nasao nga ili.
Dagiti suspek ket maysa a lalaki, agtawen ti 31, awanan asawa, utility worker, ken residente iti Brgy. 24 Nanguyudan iti ili ti Paoay ken maysa a babai, agtawen ti 28, awanan asawa, promodizer, ken residente iti Brgy. Quiling Sur iti nasao a siudad.
Segun ti Police Lt. Jimmy Aganon, deputy chief of police ti Batac City Police Station, ti nagbalin a depensa ti babai ket inbaon isuda ti dati a nobyo na gapo ta rumrumwar a daytoy ket nailumlom iti utang bayat nga adda pay laeng ti relasyon da.
Rumrumuar a ti bayad kuma ti panaglako da ti paltog ken nayun a pagbayad ti utang.
Inlawlawag na met a basar iti lalaki ket kinuyog na laeng ti babai gapo ta ti ammo na ket saan a paltog ti mapan da ikabil iti Barangay Biningan iti nasao met laeng a ciudad.
Naamoan a dagiti dua a natiliw ket dati nga agkarelasyon idi 2010 rason a nagkuyog da.
Maisagsagana metten dagiti dokumento para iti pannakapila ti kaso kontra kadagiti dua a natiliw.
Maipalagip a natiliw da dagiti dua a suspek kalpasan a naglako da iti maysa a Black Widow caliber 22 magnum nga addaan iti dua a bala, iti nagpammarang a gumatang iti paltog.
Malaksid iti daytoy, narekobre dagiti otoridad ti maysa a 1,000 peso bill, ken ti 2,000 peso boodle money.
