LAOAG CITY – Nagballigi dagiti otoridad iti insayangkat da nga anti-illegal drug buybust operation iti ili ti Dingras ken San Nicolas.
Inbatad ni Police Major Norman Pentang, ti chief of police iti ili ti Dingras, inarestar da ti maysa a delivery boy, agtawen ti 49 ken residente iti Barangay San Marcelino iti ili ti Dingras kalpasan a naglako ti maysa a sachet a naglaon ti maipagarop a shabu iti nagpammarang a poseur-buyer iti paset ti Barangay Bungcag iti metlaeng nadakamat nga ili.
Nakumpiskar pay iti ikot ti suspek ti tallo a sachet a naglaon ti maatap a shabu.
Kuna ni Pentang nga iti pannakaeksamen dagiti naala nga ebidensya kontra it suspek ket positibo ti resulta na.
Innayon na nga uray ti suspek ket positibo ti resulta ti pannakaipadalan na iti drug test.
Kabayatanna, kinemmeg met a dagus dagiti otoridad ti maibilang kas Street Level Individual nga agtawen ti 50 ken residente iti Barangay 16, San Marcos iti ili ti San Nicolas kalpasan a naglako ti nasurok a maysa a gramo a maipagarop a shabu iti nagpammarang a poseur-buyer.
Agpada a sumango dagiti suspek iti panaglabsing ti Republic Act 9165 wenno Comprehensive Dangerous Drugs Act of 2002.
Maibilang dagitoy kas Newly Identified iti Drug Watchlist ti PNP San Nicolas ken Dingras.
