LAOAG CITY – Nagdinnungpar ti maysa a kurong-kurong ken pick-up iti paset ti General Luna, Corner Peralta St., Brgy. 4 ditoy siudad ti Laoag.
Inpakaammo ni PSSgt. Alexson Rosal, Duty Investigator ti Philippine National Police Laoag Traffic Division a ti driver ti kurong-kurong ket agtawen ti 18, estudiante ken residente ti Brgy. 14 ditoy siudad.
Kabayatanna, kuna na a ti nangiturong ti pick-up a Ford Ranger ket agtawen ti 69, inhinyero ken residente iti Brgy. 2 ditoy met laeng siudad.
Inbatadna a basar iti naisayangkat nga imbestigasion, bayat a nga agturong iti laud ti kurong-kurong ket dita a kellaat a dimmungpar ti pick-up nga agturong iti abagatan.
Gapu iti daytoy, nagsagaba ti driver ti kurong-kurong ti sugat iti akinkannawan a sakana idinto nga angalen ti kaduana a nakalugan ti akinkannawan nga imana gapu iti impact ti desgrasia.
Kuna ni Rosal a nadadael ti akinkannigid a bumper ti SUV idinto a nakuppit ti akinkannawan a paset ti kurong-kurong.
Kabayatanna, inlawlawagna a basar iti nakalapda a kopya ti Close Circuit Television wenno CCTV camera ket dita a naammoan a nagdirdiretso ti SUV a rumbeng koma daytoy nga agsardeng iti kalsada.
Mainaig iti daytoy, inpakaammo ni Rosal nga apaman a nagsasarita dagiti agsinnungbangir a partido ket nagbinnara dagitoy agingga a nagsinnungbat ti driver ti kurong-kurong ken ti asawa ti nangiturong ti SUV.
Nupay kasta, kuna na a napagtutulagan met laeng a bayadan ti inhinyero ti pannakatarimaan ti kurong-kurong.
