LAOAG CITY – Maysa ti nagtalinaed iti ospital ken maysa met ti nagsagaba ti gasgas iti nagduduma a paset ti bagi iti napasamak a desgrasya iti paset ti Brgy. 40-Buyon iti ili ti Bacarra.
Kuna ni PMaj. Arnel Tabaog, ti hepe ti PNP-Bacarra a basar iti panagimbestigarda ket nagsardeng ti maysa a wigo a kotse nga inturong ni Elizabeth Aginaldo, agtawen ti 58 ken residente iti Brgy. 1 iti ili ti Pasuquin ken gimmatang iti paggatangan ti prutas iti igid ti kalsada.
Kuna na nga idi ag-u-turnti wigo ket naripar na nga adda ti sumungad ken agpaamian a big bike nga inturong ni Michael Ian Tapida, agtawen ti 32 ken residente iti Brgy. Acosta iti siudad ti Batac.
Inbatad na nga inpagarup ti driver ti wigo nga adayo pay ti big bike rason a nagtultuloy ti panag-u-turn na.
Nu pay kasta, arig a kimat a simmalpot ti big bike iti wigo rason a naikkat ti maysa a ligay daytoy iti likod ken naipurwak ti driver manipod iti motorsiklo na.
Kabayatanna, nagtultulidtid ti ligay agingga a timmama met iti bisikleta ti siklista a residente iti ili ti Pagudpud.
Gapu iti daytoy, nagsagaba ti sugat iti takyag ti driver ti big bike ken sumagmamano a gasgas iti nagduduma a paset iti bagi ti sinagaba ti siklista.
Inbatad ni Tabaog a manamnama nga agsarita ti driver ti wigo ken ti big bike para iti pannakasolbar ti danyos nga intunda ti desgrasya idinto a saan metten nga agipila ti aniaman a reklama ti siklista.
