LAOAG CITY – Manamnama ti pannakaipila ti kaso kontra iti natiliw a nagtakaw iti manok iti maysa a farm iti ili ti Paoay.
Basar iti Philippine National Police iti ili ti Paoay, dagiti suspek ket agtawen ti 18 a residente iti Brgy. 2, San Roque ken ti kadua na a taga Brgy. 3, Salbang a manarimaan pay laeng a mabirbirok.
Segun kenni Police Captain Jackson Sugayen, ti chief of police ti Philippine National Police iti ili ti Paoay, nagreprt kadakuada ni Lucky Jay Exevea Geron agtawen ti 29, naasawaan ken residente iti Brgy. 19, Masintoc gapo ta mapukpukaw dagiti manok da.
Inlawlawag na a basar iti agtagikua iti farm ket nakita na dagiti suspek a nakamotorsiklo ken nakaiggem ti sako isut gapo na a nagkamang iti pulisya.
Inbatad na iti imbestigasyon da ket simrek dagiti suspek iti farm ken addaan ti sako a ditoy ti nangipanan da kadagiti tallo a manok nga agbalor ti lima ribo a pisos ti maysa ken agdagup amin iti 15 ribo a pisos.
Kunana ni Sugayen nga iti panangarestar da kadagiti suspek, maysa laeng ti natiliw gapo ta induron ti maysa kadagiti suspek ti pulis a nangitunda iti pannakasugat na agingga a naglibas a nagturong iti abagatan.
Iti agdama, ti maysa kadagiti suspek ket nagtalinaed iti kwerpo ti pulisya ken sumango iti kaso.
