LAOAG CITY – Nasugatan dagiti dua a lallaki kalpasan ti napasamak a pammagkong iti Sitio Cabcabot, Barangay Capurictan iti ili ti Solsona.
Nabigbig dagiti biktima ket isuda Rual Agno, agtawen ti 34, naasawaan, maysa a driver ken ni Mark Neil Balmes, agtawen ti 27, awanan ti asawa, idinto a ti suspek ket ni Rommel Agno, agtawen ti 52, naasawaan, mannalon ken agpapada dagitoy a residente iti nasao a barangay.
Segun kenni Police Captain Randy Damo, ti chief of police ti Philippine National Police iti nasao nga ili, dagiti biktima, suspek ken maysa pay nga indibidual ket naggi-inom kageddan ti panag-videoke da idi adda ti saan a nagkinnaawatan ti suspek ken ni Rual gapo iti song book.
Inlawlawag na a maysa kadagiti kinainuman da ket binakal na ti bassit a bato ti song book nga iggem ni rual ken ti napabasol ket ni Rommel isut gapo na nga inbaot na suspek ti nadakamat a song book.
Gapo iti daytoy, nagawid ti suspek ngem idi nagsubli ket addan ti kutsilyo nga iggem na ken binagkong na ni Rual iti akin-kannawan nga ima na.
Kunana a ginandat a naganawa ni Mark Neil ngem isu ti nangitunda ti pannakasugat met ti kikit ti ima na ken rumrumuar a naikkat.
Naitaray met dagiti biktima iti Rural Health Unit iti ili ti Solsona para iti pannakataming da ken dumalan dagitoy ti operasyon iti ospital idinto a ti suspek ket natiliw pakairamanan ti 16 inches nga inusar na a kutsilyo.
Kinumpirmaran na a desidido met dagiti biktima a mangipila ti reklamo kontra iti suspek partikular ti frustrated homicide.
Kabayatanna, inbatad ti suspek a napunwan laeng isuna gapo ta maipagarop a masansan ti panangdangran kenkuana ti kaanakan na a ni Rual ngem binaybay-an na daytoy iti kallabes.
Kunana a nasayaat isuna a tao ngem nasakit ti nakem na gapo iti kanayon a panangdanog kenkuana ni Rual agingga a saan nan a nalapdan ti bagbagi na.
Iti agdama, kalikagom ni Rommel a makapagsarita da a nasayaat iti biktima kageddan ti panagpadespensar na.
