LAOAG CITY – Dua nga indibidual dagiti nasugatan kalpasan ti pannakadungpar ti kurong-kurong babaen ti close van iti airport road a paset ti Brgy. 50-Buttong ditoy siudad ti Laoag.
Segun ken ni Pol. SSgt. Mark Briones, duty traffic investigator iti PNP Laoag Traffic Division, bayat nga agpadpadaya ti kurong-kurong nga inturong ti agtawen ti 34 a lalaki ken residente iti Brgy. 1 ditoy siudad ket kellaat a nadungpar ti van nga agpapalaud ken inturong ti agtawen ti 41 a lalaki a residente iti Brgy. Calayab ditoy met laeng siudad.
Gapu iti daytoy, nagsagaba ti nakana a sugat iti ulo ti driver ti kurong-kurong agraman ti inlugan na nga agtawen ti 52 a lalaki ken residente iti Brgy. Cavit ditoy siudad.
Kabayatanna, saan a nagsagaba iti aniaman a sugat ti nangiturong ti close van.
Naamoan nga immagaw ti linya ti driver ti close van rason a naderetso na a nadungpar ti kurong-kurong.
Agpada a naitaray iti Laoag City General Hospital dagiti dua a naglugan iti kurong-kurong ngem nagtalinaed a maag-agasan ti driver.
Mainaig iti daytoy, inpakaammo ni Briones nga addan ti pakpakauna a panagsasarita dagiti dua a partido mainaig iti napasamak a desgrasya.
