LAOAG CITY – Inbatad ni Police Lt. Col. Adrian Gayuchan, ti chief of police iti ciudad ti Batac a nagsagaba ti sugat ken sumagmamano a gasgas ti bagi dagiti dua nga indibidual a nakalugan iti nagbaliktad nga Hyundai Close Van iti paset ti Barangay Baay iti nasao a ciudad.
Binigbig ni Gayuchan ti driver ti lugan a ni Mark Anthony Cueto y Lavarez, agtawen ti 34, awanan asawa ken residente iti Ilaya St, Alabang, Muntinlupa idinto a ti kadwana ket ni Alex Cueto y Barnedo, agtawen ti 60, naasawaan, inhinyero ken residente iti 19 Southville, Muntinlupa.
Basar ti imbestigasion ti Philippine National Police iti ciudad ti Batac, agpapa-abagatan ti behiluko ken idi madanun na ti agkurba a paset ti kalsada ket bigla a napukawan ti kontrol ti manibela ti driver a nangitunda ti panagbaliktad daytoy.
Naitaray a dagus dagiti biktima iti Mariano Marcos Memorial Hospital and Medical Center iti siudad ti Batac para iti naan-anay a pannakatamingda.
Kabayatanna, inpakaammo ni Gayuchan a saan a nakainom ti nasanger ti driver ti Hyundai Close Van idi napasamak ti insidente.
