LAOAG CITY – Nasugsugatan dagiti dua nga indibidual kalpasan a nagbaliktad ti maysa a 14 wheeler truck iti national highway bisinidad iti Brgy. San Simeon iti ili ti Currimao.
Binigbig ni PCapt. Chris Anthony Sorsano, ti hepe ti PNP-Currimao dagiti biktima nga isuda Mariano Lucas, driver ti truck kenni Jomar Maler nga isu ti pahinante ken agpada dagitoy a tubo iti Bulacan.
Inbatad ni Sorsano a basar iti naiyuswat nga imbestigasyon, agpapamianan a direksyon ti truck idi ta kellaat a napukawan ti kontrol iti manibela ti driver apaman a nadanon ti kurbaan a paset ti kalsada.
Gapu iti daytoy, nagderderetso a naidungpar ti truck kadagiti poste ti kuryente agingga a nagbaliktad.
Nagsagaba ti sugat iti nagduduma a paset ti bagi ti driver ken pahinante idinto a naipakbo dagiti sinako a feeds ken abono a kinarga ti truck.
Apaman a maisursurat ti damag ket naamoan nga addan iti nasayaat a kundisyon ti driver ti truck idinto nga agtultuloy a maag-agasan iti ospital ti pahinante.
