LAOAG CITY – Nagtalinaed iti ospital dagiti biktima ti panagdinnungpar ti motorsiklo ken kurong-kurong iti paset ti Brgy. Bungon iti siudad ti Batac.
Rumrumuar iti imbetigasyo dagiti kameng ti PNP-Batac a ti Mio 125 a motorsiklo nga inturong ti maysa a lalaki nga addan iti legal nga edad ken residente iti Brgy. Pimental iti nasao a siudad ket rumuar manipod iti pagpapaayan na a gasolinaan.
Bayat nga agpaabagatan a direksyon ket dita a nasabat na ti kurong-kurong nga inturong ti lalaki nga adda met laeng iti legal nga edad ken residente iti Brgy. Bungon.
Gapu iti daytoy, nagidunnungpar dagiti dua a behikulo rason a natumba ti motorsiklo ken nagbaliw ti turong ti kurong-kurong.
Agpada a nagsagaba ti sugat iti nagduduma a paset ti bagi dagiti dua a biktima ken dagus a naitaray dagitoy iti ospital.
Apaman a maisursurat ti damag ket awan pay ti panagsarita dagiti agsinnumbangir a partido ken saan pay a masinunuo nu maysa kadagitoy ti adda iti impluwensya ti nasanger.
