LAOAG CITY – Nasugsugatan dagiti dua a lallaki kalpasan a nabagkong dagitoy iti Brgy. 20 iti ili ti Sarrat.
Binigbig ni PMaj. Carlo Abing, ti hepe ti PNP-Sarrat dagiti biktima nga agtawen ti 51, naasawaan, negosyante ken residente iti Brgy. Francisco iti nasao nga ili ken maysa nga agtawen ti 36, naasawaan, residente iti Brgy. Loing iti ili ti Piddig.
Inbatad na a basar iti imbestigasyon, aggi-inom dagiti biktima ken ti dua a pagayam da idi ta kellaat a rinaot ti suspek nga agtawen ti 39, ken residente iti Brgy. 22 iti ili ti Sarrat dagitoy.
Kuna na nga iti pannangdanun ti suspek kadagiti biktima ket adda ti iggem na a kutsilyo ken isu metten ti inbagkong na iti agtawen ti 51 a biktima.
Gapu iti daytoy, naganawa ti agtawen ti 36 rason a nairaman a nasugatan.
Naamoan nga dati nga agpapay ti suspek iti biktima nga agtawen ti 51 ngem naikkat rason a daytoy ti posible a motibo na iti nasao nga insidente.
Nagsagaba ti agtawen ti 36 ti sugat iti bukot idinto a sugat iti kilikili, ima ken buksit ti agtawen ti 51.
Kabayatanna, nagsagaba met iti sugat ti ulo ti suspek kalpasan a napang-or ti bote bayat ti pannagatake na kadagiti biktima.
Nagtalinaed iti ospital dagiti biktima idinto nga iti kustodyar ti PNP ti suspek bayat a maisagsagana ti maipila a kaso a double frustrated murder kontra kenkuana.
