LAOAG CITY – Natay dagiti dua nga inidbidual kalpasan ti napasamak a pammaltog iti Brgy. Nagsanga iti ili ti Pasuquin.
Nabigbig dagiti biktima nga isuda Larry Bumiltak alyas Boy Kulot, agtawen ti 36 ken Alicia Carunan, agpada a residente iti Brgy. Pangil iti nasao nga ili.
Basar iti inisyal nga imbestigasyon dagiti otoridad, aggi-inom iti arubayan ti maysa a pagtaengan dagiti biktima pakairamanan ti asawa ti babai a ni Elmer Natividad ken maysa a pay a lalaki a nabigbig a ni Edwin Bonoan.
Kabayatanna, kellaat a limmabas dagiti saan pay a nabigbig a suspek a naglugan iti motorsiko ken pinaltu-paltoganda dagiti biktima.
Dagus a nadasay ni alyas Boy Kulot iti nakapasamakan ti insidente idinto a naitaray iti ospital ni Carunan ngem naideklara a dead on arrival.
Kabayatanna, kuna ni Brgy. Chairman Rogelio Menor iti Brgy. Pangil a datin a mapmapan iti barangayda ni alyas Boy Kulot.
Nu pay kasta, saanna nga ammo ti pudno a kinatao daytoy ken burburtsya kenkuana ti kaadda dagiti maseknan iti nasao a ligason agsipod ta saanda met a residente iti barangay da.
Agpapan a maisursurat ti damag ket awan met pay ti pamalpalatpatan a motibo iti nasao a pammaltog ken manarimaan ti panangiyuswat dagiti otoridad iti naun-uneg nga imbestigasyon.
