LAOAG CITY – Dua nga indibidual ti naireport a natay kalpasan ti napasamak a pammaltog iti maikapat a kadsaaran ti Ateneo de Zamboanga University Junior High School Campus ita nga aldaw.
Basar iti inisyal a report dagiti otoridad, maysa nga estudyante a Grade 9 ti maitudtudo a suspek a maipagarop a nagusar ti dua a klase ti paltog, maysa a 9mm pistol ken m16 rifle iti uneg ti pasdek.
Nabigbig dagiti pimmusay a maysa a grade 10 student, ken ti mismo a suspek a maysa a Grade 9 honor student (Top 1) a nangpaltog ti bukod na a bagi kalpasan ti insidente.
Agtultuloy ti naiget nga imbestigasyon dagiti otoridad tapno maamoan ti motibo ti suspek, no kasanu a naiserrek dagiti nangangato ti kalibre na a paltog iti uneg ti pagadalan, ken ti opisyal a pakabigbigan dagiti biktima.
Kabayatanna, indanon ti gobierno lokal iti ciudad ti Zamboanga ti pannakipagladingit na mainaig iti napasamak a pammaltog iti maysa kadagiti mabigbig a pagadalan iti ciudad.
Basar iti lokal a gobierno, manarimaan ti pannakikoordinar da iti liderato ti pagadalan iti Zamboanga City Police Office (ZCPO), ken iti dadduma pay a maseknan nga otoridad tapno makaipaay ti dagus tulong kalpasan ti insidente.
Inpasigurado ti lokal a gobierno iti ciudad iti publiko a kontroladon ti sitwasyon ken naipatungpalen dagiti maiyannatop nga addang iti seguridad, gapu ta nagtalinaed ti kangatoan a prayoridad ti seguridad dagiti estudyante, mangisursuro ken ti sibubukel komunidad.
Kagiddan iti daytoy, nagpanawgan ti lokal a gobierno iti ciudad iti amin nga agtalinaed a kalmado, agbalin nga alerto, ken agbalin a responsable iti babaen ti saan a panagiwaras kadagiti saan a beripikado nga impormasyon, tsismis, ladawan, wenno video a mabalin a mangitunda ti panagbuteng wenno makaapektar iti imbestigasyon ti pulisya.
