LAOAG CITY – Natiliw dagiti dua nga indibidual gapu iti illegal a panagtupada iti Barangay 10, Macayepyep iti ili ti Banna.
Segun ken ni Police Lt. Lester Arellano, iti chief of police iti ili ti Banna, ado dagiti nagtutupada iti lugar ngem nakataray dagiti dadduma ken dagiti laeng dua ti natiliw da.
Binigbig ni Arellano dagiti natiliw nga isuda Simplicio Samoy y Tungpalan, agtawen ti 53, naasawaan, mannalon, drug surrenderer; ken ni Feil Dominic Tolentino y Baynosa, agtawen ti 21, baro, construction worker, agpada a residente iti nadakamat a barangay.
Inpakaammo ni Arellano nga iti panagresponde da iti lugar ket ditoy a naaktwaran da ti panagtutupada dagiti suspek.
Nakumpiskar a iti lugar ti dua ribo a pisos a maipagarop a pusta dagiti suspek, dua a para pallot a manok no sadinno a ti maysa ket natay idinto a ti maysa ket sibibiag, ken dagitoy ket agpada nga addaan ti tari.
Maisagsaganan ti reklamo a maipila kontra kadagiti suspek.
