LAOAG CITY – Natiliw iti dua a lalaki gapo iti illegal a panagpukan da ti kayo wenno illegal logging iti ili ti Vintar.
Segun ken ni PCapt. Roi Manuel Ordonio, ti chief of police iti Philippine National Police iti ili ti Vintar, ti maysa a suspek ket agtawen ti 49, naasawaan, residente iti Brgy. 18, Abkir iti ili ti Vintar idinto a ti maysa ket addaan ti umno a tawen, naasawaan, ken residente iti Brgy 20, Pulangi iti ili ti Bacarra.
Inbatad ni Ordonio a naireport kadakuada babaen ti maysa a concerned citizen nga adda ti agisaysayangkat ti illegal a panagpukan ti kayo iti Sitio Salinong, Barangay Abkir iti ili ti Vintar.
Iti panagresponde dagiti otoridad iti nadakamat a lugar kadwa da dagiti kameng ti Municipal environment and Natural Resources Office ket naaktwan da dagiti suspek a manarimaan nga agpukpukaw ti kayo a G-melina.
Gapo iti daytoy, kinumpiskar dagiti otoridad ti chainsaw nga us-usaren dagiti suspek iti illigal nga aktibidad.
Kunana a karaman pay a nakumpisakar iti lugar ket ti 2 a napukaw a g-melina tree, 7 a pidaso ti 2x5x5 lumbers, 2 logs nga agatiddog ti 30cmx25cm, 34cmx24cmx12ft.
Inpakaammo ni Ordonio a ti nakumpisakar a chainsaw ken lumber ket naikabil iti kwerpo ti pulisya iti nasao nga ili idinto a ti 2 a logs ket naipaima kadagiti opisyal ti barangay.
Kuna pay ni Ordonio a dagiti naririt a kayo ket usaren dagiti suspek iti panagaramid ti furnitures.
Iti agdama, dagiti dua a suspek ket adda iti kustodiyar ti Philippine National Police ken manamnama nga agbayad da iti piyasa nga agbalor iti 15 ribo agingga iti 20 ribo a pisos para iti temporaryo a pannakawaya-waya da.
