LAOAG CITY – Natiliw ti dua nga indibidual gapu iti panagtiliw ken panagparti da ti pawikan iti Barangay Payas iti ili ti Burgos.
Daytoy ti kinumpirmaran ni Police Executive Master Sergeant Jonathan Caldito, ti Deputy Chief of Police iti ili ti Burgos.
Segun ken ni Caldito, dagiti suspek ket agtawen ti 41 ken 34, agpada a mangngalap ken residente dagitoy iti nadakamat a barangay.
Inlawlawag ni Caldito a ti impormasyon nga adda dagiti nagtiliw ti pawikan iti nadakamat a barangay ket naggapo a mismo iti Ilocos Norte Police Provincial Office.
Kuna na nga insigida da a napan nagresponde iti lugar ken ditoy a natiliw da dagiti suspek ken nakumpiskar da ti dakkel a pawikan.
Inpakaammo ni Caldito nga agtultuloy paylaeng ti imbestigasyon da tapno maamoan no adda pay ti sabali a kadwa dagiti suspek ken adalen da no ania ti rumbeng a maipataw a pannusa kadagiti maseknan.
Kabayatanna, immapela ni Caldito kadagiti residente kangrunaan na dagiti mangngalap a saan da nga agtiliw ken agparti ti pawikan gapu ta mailabsing daytoy iti linteg.
Innayon na a no adda ti matiliw da a pawikan ken dadduma pay nga endangered specie ket ipakaammo da a dagus iti opisina da wenno iti Department of Environment and Natural Resources tapno maisubli dagitoy iti baybay.
