LAOAG CITY – Kinumpirmaran ni Police Captain Christian Felix, hepe ti PNP Pasuquin nga awan ti permit dagiti dua a tattao a natiliw a nagibiyahe iti bonsai.
Kuna na a panagsalungasing daytoy iti RA 9147 wenno posessing and transporting wildlife ken daytoy ti maisagsagana a maipila a reklamo kontra kadagiti maseknan.
Natiliw iti Brgy. 1 Poblacion, Pasuquin da Gerald Lewin Abella y Bareng, agtawen ti 31, naasawaan, mannalon, ken residente iti Brgy. 22 Dilanis, Pasuquin kenni Adonijah Eda y Maestro, agtawen ti 43, naasawaan ken residente iti Brgy. 31 Carusikis iti nasao nga ili.
Kuna ni Felix a siyam a pidaso ti bantigue ken maysa nga igem-dagat babaen ti panangbigbig dagiti pannakabagi ti DENR.
Kabayatanna, inadmitir ni Gerald Lewin Abella nga innala da dagiti bonsai iti pagtaengan da ken taraken da daytoy.
Kuna na nga ibiyahe da dagiti bonsai iti Candon, Ilocos Sur tapno ipaurnos da kadagiti artist para iti maangay a bonsai show intono Disyembre iti maysa a dakkel a mall.
Inbatad ni Abella a dati nga ar-aramiden da ti panagibiyahe ti bonsaipara iti pannakisalip da iti show.
Inadmitir na met nga awan ti permit na nga agtaraken ken agibiyahe iti bonsai gapu ta ti ammo da a maiparit ket dagiti agal-ala kadagiti mapagbalin a bonsai.
Kuna na a ginatang da dagiti bonsai idi dua a tawen na pay laeng ken isudan ti nangituloy a nangtaraken kadagiti nasao a mula.
Inpetteng ni Abella a ti ammo da ket saan a maiparit iti panagibiyahe dagiti fully grown bonsai gapu ta saan da a namnamaen a matiliw da iti ili ti Pasuquin.
Inpakaammo na nga adda ti grupo da ditoy probinsya nga Ilocos Norte Bonsai Society ken maysa a miembro daytoy.
Inpakita ni Abella ti ID ti grupo da ken nailanad a naiyisyu idi tawen 2018 ken maibagbaga a ti grupo ket isu laeng ti lehitimo a bonsai club ditoy Ilocos Norte.
Nailanad pay a dagiti miyembro ti grupo ket isuda laeng ti naikkan ti pammalubos nga agala ken agpatamor ti bonsai tapno maitandudo ti art of bonsai ken napirmaan ni Hon. Imee Marcos idi isuna ti gobernador ditoy probinsya.
