LAOAG CITY – Natiliw iti maysa nga indibidual iti naisayangkat a buy-bust operation iti Brgy. 1, Guerrero Street ditoy ciudad ti Laoag.
Ti suspek ket residente metlaeng iti nadakamat a barangay.
Nakumpiskar manipod iti suspek ti lima a transparent plastic sachet a naglaon ti maipagarop a shabu nga agdagsen ti 1.7 a gramo.
Malaksid iti daytoy, naala pay iti suspek ti sangaribu a pisos a nausar kas buy-bust money.
Nagkedked metten ti suspek ken uray dagiti otoridad a nagpainterview iti Bombo Radyo Laoag seknan iti naiyuswat nga operasyon.
Kabayatanna, natiliw met ti maysa pay a lalaki iti sabali pay a drug buy bust operation a naiyuswat iti Brgy 40, Buyon iti ili ti Bacarra a nakakumpiskaran dagiti otoridad ti maysa a transparent plastic sachet a naglaon ti maipagarop a shabu ken ti sangaribo a pisos a nausar kas buy-bust money.
Nabigbig ti suspek a ni Patrick Jayson y Avila, agtawen iti 36, naasawaan, drug surrenderee ken taga Brgy. 8, Margaay iti ili ti Vintar.
Iti pannakisarsarita ti news team ti Bombo Radyo Laoag iti suspek ket inpetteng na a saanna a bagi dagiti naala nga ebidensya kontra kenkuana ken inpasingked na a saan nga aglaklako iti illegal a droga.
