LAOAG CITY – Maluksaw ken nasakit ti nakem ni Miss Dana Caletina ditoy ciudad ti Laoag gapu iti nagbalin a kapadasan na ken maysa pay a kadwa na iti Governor Roque Ablan Senior Memorial Hospital.
Inlawlawag ni Caletina a kabayatan ti panangbanbantay na iti kaanakan na iti nasao nga ospital ket napukaw ti wallet na a naglaon ti 15 ribo a cash, ATM ken Identification Cards.
Segun kenkuana, iti oras ti alas-11 idi rabii ti Domingo ket adda ti napan iti ayan da a kwwarto tapno makiusar ti Comfort Room no sadinno nga adda laeng iti abayna ti kama da.
Kuna na a gapu ta makaturturogen ket saanna unayen a naikaso ti simrek iti Comfort Room, ngem basar iti maysa a kadwa da iti kwarto da ket nakaarwat ti adda ti hood na, facemask ken saan a malasin no babai wenno lalaki daytoy.
Inpalgak na nga idi makapoot iti alas-dose ti tengnga na ti rabii gapu ta ag-nebulizer ti kaanakan na ket ditoyen a naduktalan na nga awanen ti pitaka na.
Innayon na nga iti dayta metlaeng a gundaway ket inpakaammo met ti maysa a kadwa da iti kwarto nga uray ti pouch na a naglaon ti 4 a ribo a pisos ket mapukpukaw.
Mainaig iti daytoy, kuna ni Caletina a napanda iti Nurse Station tapno ipakaammo a kayat da nga ireport ti napasamak iti Provincial Security Guard.
Kalpasan iti daytoy ket nagsursur da iti kada kwarto ngem saan da a nakita dagiti mapukpukaw a pitaka ken pouch da.
Kiniddaw pay da Caletina a marebisar ti Closed-circuit television (CCTV) ngem maipagarop a saan nga inkaskaso dagiti maseknan agingga a nakarwar dan iti ospital.
Kabayatanna, kuna ni Caletina a naisubli metlaeng kadakuada ti pitaka ken pouch ngem awanen dagiti kwarta no sadinno a dagitoy ket adda ti napan nangikabil iti police outpost iti Bacarra road.
Malaksid iti isyu a pannakapukaw ti pikata ken pouch da Caletina ken ti kadwa na iti nasao nga ospital ket adda met ti nagreklamo a pasyente a ni Mr. Carlito Domingo gapu iti maipagarop a saan a nasayaat a pannakisarita ken panangtrato kadakuada ni Doctora Nema Queja.
Immunan a nagturong ti news team ti Bombo Radyo Laoag ken ni Dra. Queja, pakairamanan iti Provincial Security Guard ken iti Governor Roque Ablan Senior Memorial Hospital ngem nagkedked dagitoy a nangipaay ti komento da seknan kadagiti nasao a pasamak.
