LAOAG CITY – Nasugsugatan dagiti nangiturong ti dua a motorsiklo kalpasan ti napasamak a desgrasya iti National Highway a paset ti Brgy. 10, San Vicente iti ili ti Bacarra.
Inbatad ni Police Staff Sergeant Erickson Guira, ti Imbestigador ti PNP-Bacarra a ti driver ti motorsiklo nga sky drive ket babai nga agtawen ti 43 ken residente ti Brgy. Poblacion 2 iti ili ti Pasuquin.
Kabayatanna, inpakaammo na a ti nangiturong ti maysa pay a motorsiklo a rusi ket lalaki nga agtawen ti 28 ken residente iti Brgy. 15, Pangil iti ili ti Pasuquin.
Inpakaammo ni Guira nga iti naiyuswat nga imbestigasyon, bayat nga agpadpadaya ti nangiturong ti rusi ket dita a kellaat a dimmungpar ti nangiturong ti sky drive nga agturong iti amianan.
Gapu iti daytoy, kuna ni Guira nga agpada a nagsagaba ti sugat iti nagdumaduma a paset ti bagi dagiti maseknan a driver.
Inbagana naitaray dagitoy iti Governor Roque Ablan Sr. Memorial Hospital para iti naan-anay a pannakatamingda.
Naamoan nga Accident Prone Area ti nakapasamakan ti desgrasia ken agpada a saan a nakasuot ti helmet dagiti dua a driver idi napasamak ti desgrasya.
