LAOAG CITY – Tiniliw dagiti kameng ti PNP-Laoag babaen iti entrapment operation dagiti dua nga indibidual pakairamanan ti maysa a menor de edad gapo iti maipagarop a panaglako da ti gasolina iti Barangay Navotas ditoy ciudad.
Nabigbig ti maysa kadagiti suspek a babai a ni Angelica Bianca Cagas, agtawen ti 30, addaan ti live in partner, tubo iti South Cotabato ngem agdama nga agnanaed iti nasao a barangay idinto a ti menor de edad ket agtawen ti 15.
Nakumpiskar dagiti otoridad iti operasyon tallo a litro ti softdrinks ngem naglaon dagitoy ti gasolina, tallo a medium size galloon ken tallo a dadakkel a galloon a naglaon met laeng ti gasolina, pakairamanan dagiti naggawangan a 21 a litro.
Mainaig iti daytoy, inbatad ni Cagas a ti gasolina ket us-usaren laeng ti asawa na gapo ta inaldaw nga agbibyahe kas maysa a contractor iti ili ti Marcos.
Inlawlawag na a sakbay nga agbyahe iti bigat ket aggasolina manipud iti stock kageddan ti panangipetteng na a saan da nga aglaklako.
Rumrumuar a saan nga ammo ni Cagas nga aglaklako ti menor de edad ti gasolina ngem inpetteng ti PNP a nakagatang da ti gasolina iti naiyuswat nga entrapment.
