LAOAG CITY – Pimmusay dagiti dua nga indibidual iti napasamak a pammaltog iti bypass road iti Barangay Madamba iti ili ti Dingras.
Nabigbig ti maysa kadagiti biktima a ni Keith Dhenelle Garabiles, agtawen ti 32, kameng ti Civil Security Unit ken residente iti Barangay Guerrero idinto a ti babai ket ni Manilyn Marcelino, agtawen ti 49.
Segun kenni Sang. Bayan Member Ruben Taylan iti nasao nga ili ken uliteg ti biktima a ni Keith Garabiles, dagus da a nagturong iti nakapasamakan ti insidente ken nakumpirmaran da a ti kaanakan na daytoy.
Inlawlawag na a basar iti naipadanon kenkuana nga impormasyon ket rumrumuar nga agarop 11:30 idi rabii idi napasamak ti insidente.
Kunana a saan da nga ammo no anya ti koneksyon dagiti dua a biktima ken nasdaaw da no anya ti kaadda da iti lugar.
Inbatad na nga idi nagturong da iti lugar ket nakita da a ti lalaki ket nakatugaw iti drivers side ken adda ti tama iti tengnged na idinto a ti babai ket adda iti passenger side.
Kinumpirmaran na nga idi Agosto ket adda ti naawat ti lalaki a biktima ti pangta iti biag a mangibagbaga nga alwadan na ti liklikodan na.
Mainaig iti daytoy, inpakammo ni Sang. Bayan Member Ruben Marcos ken agtagikwa iti funeral homes a ni Garabiles ket nagsagaba ti uppat a tama ti paltog idinto a ni Marcelino ket nagsagaba ti innem a tama ti paltog iti bagi na.
Kabayatanna, inbatad ni Mr. Prudencio Garabiles nga awan ti ammo na a rason iti pannakapapatay ti anak na ken a naudi a nakita da iti kalkalpas a nagdisgos ken rimuar iti pagtaengan da.
Kinumpirmaran na nga idi Agosto ket adda ti pangta iti biag kadagiti annak na ken ti asawa na no sadinno ket mabalbalakadan nga agannad dagitoy.
Nupay kasta, kunana a saan na a masigurado no adda ti pakainaigan ti naawat a pangta iti biag ken iti napasamak iti anak na.
Saan met nga ammo ti ama a Garabiles no anya ti koneksyon ti anak iti babai a maysa pay a biktima ken burbutya kenkuana no apay a kastoy ti nakapasamakan dagiti dua.
Agtultuloy ti imbestigasyon ti PNP iti nasao a pammaltog tapno maamoan no anya ti motibo ken no siasinno ti suspek.
