LAOAG CITY – Umabot iti dua a tattao ti natay idiay Morocco kalpasan ti panagpaltog dagiti pulis tapno maprebentaran dagiti protesters iti panangraot da iti police station idiay Lqliaa, asdieg iti coastal city ti Agadir.
Daytoy ti kaunaan a nairekord a pimmusay sipud nangrugi ti panagprotesta dagiti agtutubo iti nadakamat a pagilyan.
Namunganay ti panagprotesta dagitoy gapo iti desisyonti gobierno ti Morocco a mangipatakder ti football stadiums para iti 2030 Fifa World Cup imbes a padur-asen da ti public services ken trataren ti economic crisis.
Inbatad dagiti agtutubo a mangipatakder ti gobierno ti stadiums ngem awan met ti napintas nga ospital iti lugar da.
Kuna ti maysa kadagiti demonstrador nga adda ti ospital iti ciudad da nga Oujda, iti border da iti Algeria ngem arig na maysa daytoy a pagbaludan gapo iti kinarugit na.
Malaksid iti daytoy, kunana a masapol pay laeng a mapasuksukan dagiti security officers ken nurses tapno makapagpakonsultar iti doctor.
Kabayatanna, inbatad met dagiti kapulisan a napilitan da a kastoy ti inaramid da kas “legitimate self-defense.”
