LAOAG CITY – Dua nga indibidual ti natay idinto a nasurok a 20 a sabsabali dagiti nasugatan kalpasan a naidungpar ti maysa a Mexican Naval Ship iti Brooklyn Bridge.
Segun iti U.S. Coast Guard, 21 a tattao ti nasugatan a dagus a nailugan iti bassit a bangka para iti pannakaikabil da iti ospital.
Immunan nga inbatad ni Mayor Eric Adams a dua kadagiti nasugatan ti kritikal ti kondisyon na.
Inpakaammo ti mayor nga umabot iti 277 a tattao dagiti nakalugan iti barko idi napasamak ti insidente.
Rumrumuar a napukawan ti kontrol ti barko gapu iti mechanical error kabayatan ti iruruwar na iti Pier 17 nga agturong koma iti Iceland.
Naamoan a ti barko ket ARM Cuauhtémoc, maysa a training vessel ti Mexican Navy.
Kabayatanna, inbatad ni Department of Transportation Commissioner Ydanis Rodriguez, nga awan ti aniaman a seryoso a perdisyon iti Brooklyn Bridge kalpasan iti insidente.
