LAOAG CITY – Dua nga indibidual ti natiliw idinto a tallo dagiti nakalibas iti naiyuswat anti-gambling operation iti maysa a minatayan iti Barangay Catangraran iti ili ti Solsona.
Daytoy ti kinumpirmaran ni Police Capt. Randy Damo, ti chief of police iti nasao nga ili.
Binigbig ni Damo dagiti natiliw a da Rudy Guerrero, agtawen ti 57 ken ni Florencio Evangelisto, agtawen ti 57 idinto a dagiti nakalibas ket isuda Benedict Ruiz, Joseph Valera ken maysa a saanen a nabigbig pay, agpapada dagitoy a residente iti nadakamat a barangay.
Inbatad ni Damo a kalpasan a naawat da ti impormasyon nga adda dagiti illegal nga agsusugal iti nadakamat a barangay ket dagus da a nagresponde iti lugar no sadinno a naaktwan da dagiti suspek nga agay-ayam ti “Lucky 9”.
Inpakaammo ni Damo a karaman kadagiti nakumpiskar dagiti otoridad iti lugar ket ti lima a monoblock chair, table cloth, lamisaan, 52 a pedaso ti baraha, ken ti nasurok a 700 a pisos a maipagarop a pusta dagiti suspek.
Maisagsaganan ti maipila a reklamo a panaglabsing iti Presidential Decree 1602 wenno Illegal gambling kontra kadagiti suspek.