LAOAG CITY – Dua nga indibidual ti pimmusay iti panagdinnungpar ti maysa a tricycle ken kurung-kurung iti paset ti Barangay Buyon iti ili ti Bacarra.
Nabigbig ti driver ti tricycle a ni Jeffrey Agas, 35, naasawaan, residente iti Barangay Duripes iti ili ti Bacarra idinto a ti nangiturong ti kurung-kurong ket ni Rogelio David, 48, naasawaan ken Poblacion 1 iti ili ti Pagudpud.
Segun ken ni Police Major Arnel Tabaog, ti chief of police iti ili ti Bacarra, agpapa-amyanan ti kurung-kurung idinto nga agpapa-abagatan met ti tricycle idi napasamak ti insidente.
Inbatad ni Tabaog a basar iti imbestigasyon da ket nag-overtake ti kurung-kurung iti maysa a behikulo ken pagisu a masabat na ti tricycle a nangitunda ti panagdinnungpar dagitoy.
Nagsagaba amin ti sugat dagiti nakalugan iti kurung-kurung nga addaan ti maysa pasahero idinto nga innem ti pasahero ti tricycle.
Agpapada a naitaray dagiti biktima iti ospital para iti naan-anay a pannakataming da ngem pimmusay ti driver ti kurung-kurung ken ti maysa a pasahero ti tricycle a maysa a babai.
