LAOAG CITY – Dua nga indibidwal ti natay kalpasan nga naidungpar da iti concrete barrier iti Bypass road iti brgy tangid ditoy ciudad ti laoag.
Segun kenni Pol. Sgt. Mark Briones, duty traffic investigator iti PNP Laoag Traffic Division, bayat nga agpaabagatan da a dua ket kellaat nga nagsinnapgod da ket ditan a naidungpar da nga agpada iti maysa concrete barrier.
Binigbig ni Briones iti nangiturong iti Mio yamaha 125 nga agmaris ti blue, maysa a babai, agtawen ti 30 ken residente iti brgy 32 apaya ditoy ciudad ken ti nangiturong iti mio yamaha sporty nga agmaris ti nangisit, maysa a lalaki, agtawen ti 18, ken residente ti brgy 54-A lagi sail ditoy ciudad ti laoag.
Gapo iti napasamak nga insidente, agpada a naburak ti rupa dagiti nasao a motorista ken naisina ti buok ti babai iti mismo a concrete barrier.
Inpakaamo pay ni Briones nga saan nga nakahelmet dagiti dua.
Naamwan pay nga iti pimmusay a lalaki ket kabarbaro unay iti driver’s license na.
Agpapan iti daytoy a gundaway, saan pay a masinunuo nu anya ti umno a rason iti insidente ngem ada ti possibilidad a naglinnungba dagiti dua manipod iti amyanan.
Agpada a naitaray iti Laoag city general hospital dagiti dua ngem naideklara da a dead on arrival.
