LAOAG CITY – Kinumpirmaran ni Police Captain Chris Anthony Sorsano, ti chief of police ti PNP-Solsona ti pannakatiliw dagiti dua nga indibidwal a pakairamanan ti barangay kagawad gapo iti panagsusugal da iti maysa a minatay iti Barangay Manalpac iti nasao nga ili.
Binigbig na dagiti natiliw nga isuda Florendo Diego y Baraoidan, agtawen ti 71, naasawaan, mannalon ken residente iti nasao a barangay, ken ni Jeslie Lamo, agtawen ti 25, awanan ti asawa, construction worker ken residente iti Barangay Aguitap iti nadakamat nga ili.
Malaksid kadagiti natiliw, adda pay ti dua a nakalibas nga isuda Ronald Tamayo y Diego ken ni Barangay Kagawad Jogie Benito, agpada a residente iti Barangay Manalpac, Solsona.
Segun kenni Sorsano, nakakumpiskar dagiti otoridad ti 9,055 a pisos, maysa a set ti baraha, ken nagay-ayam dagitoy ti lucky 9.
Inbatad na nga agpapan ita ket saan da pay a nabirukan dagiti dua a naglibas ken saan a nagawid dagitoy iti pagtaengan da.
Nupay kasta, kuna na nga ipila da kas regular filing ti kaso dagiti maseknan.
