LAOAG CITY – Kinumpirmaran ni PLt. Vivina Tanacio, ti deputy chief of police iti PNP-Badoc nga adda ti nagusar ti peke a dokumento, partikular ti RT-PCR test result iti border checkpoint iti nasao nga ili.
Segun ken ni Tanacio, agpapada a locally stranded individual (LSI) manipod iti Metro Manila dagiti innem a naglugan iti maysa nga hi-ace grandia.
Nu pay kasta, inlawlawag na a bayat a na-scan ti QR code ken dadduma a dokumento dagiti maseknan ket dua dagiti nakita a peke ti dokumento na pakairamanan ti resulta ti RT-PCR test.
Kabayatanna, inpakaammo ni Tanacio a maysa kadagiti nagusar ti palso a dokumento ket nagpositibo iti antigen test.
Gapu iti daytoy, kuna na naka-quarantine dagiti dua ken maisagsagana metten ti maiyannatop a kaso kontra kadagitoy.
Immunan nga inpakaammo ni Tanacio nga agpada a residente ditoy siudad ti Laoag dagiti nagusar ti palso a dokumento.
Mainaig iti daytoy, inbatad ni Tanacio a manipod Enero ita a tawen ket addan ti pakabuklan a 17 dagiti natiliw gapu iti panagusar ti peke a resulta ti RT-PCR test.
