LAOAG CITY – Natay dagiti dua a lallaki iti nagsina nga insidente ti panagbekkel kangrunaan iti ili ti Piddig ken iti ili ti Pasuquin.
Iti nakalap a report ti Bombo Radyo Laoag, nagbekkel ti baro a ni Mark Eric Banta, agtawen ti 22, agtrabtrabaho iti dakkel a supermart ditoy siudad ti Laoag, ken residente iti Brgy. Anao iti ili ti Piddig.
Segun kenni Police Captain Kristoffer King Ramos, hepe iti nasao nga ili, itay laeng agarup alas-sais a nakita ti ama a ni Pablito Banta ti anak na a nakabitin iti akin daya a likod ti pagtaengan da usar iti sinturon.
Kuna na a binirok ti ama a Banta ti anak na itay bigat agingga a nasapulan na iti likod ti balay da.
Mainaig iti daytoy, inbatad ti ama nga awan ti ammo na a problema iti pamilya da.
Basar ti pakpakauna nga imbestigasyon, maipagarup a depresyon ken maipagarup a nagsina da iti nobya na a possible a kinettel ti baro ti bukod na a biag.
Naitaray ti biktima iti Piddig District Hospital ngem naideklara a dead on arrival.
Nupay kasta, agtultuloy pay laeng ti naun-uneg nga imbestigasyon dagiti kameng ti PNP.
Kabayatanna, nagbekkel pay ti maysa a retired teacher iti Ilocos Norte Agricultural College iti ili ti Pasuquin.
Nabigbig ti bitkima a ni Reynaldo Luna Unnagan, agtawen ti 66, aaddaan ti live-in partner ken residente iti Brgy. Puyupuyan iti nasao nga ili.
Segun kenni Police Lieutenant Roy Manuel Ordonio, hepe ti PNP Pasuqin, agarup alas-siete itay bigat a nakita ti kadendenna ti biktima a ni Eunicia Rowena a nakabitin iti kusina ti pagtaengan da ken nasugar ti tali.
Iti pakpakauna nga imbestigasyon, inbatad ni Ordonio a gapu iti salun-at ti maipagarup a rason a nagbekkel ti biktima.
