LAOAG CITY – Agtultuloy pay laeng ti iyus-uswat nga imbestigasyon ti PNP mainaig iti pannakaserrek ti dua a pagtaengan iti Barangay Tangid ditoy ciudad ti Laoag.
Segun kenni Mr. Victor Madamba, maysa kadagiti natakawan, sakbay a naturog da ket naka-lock amin a ridaw ken tawa ti pagtaengan da.
Inlawlawag na nga itay makariing ti asawa na ket nadlaw na nga awanen ti tablet ken wallet na iti nangidosoan na isut gapo na a riniing na a dagus ni Mr. Madamba.
Kunana nga idi kinita dan ti sibubukel nga uneg ti pagtaengan da ket nakalukaten ti ridaw iti likod da, tawa ti comfort room da, ken uray dagiti cabinet.
Karaman kadagiti napukaw ket ti tablet nga agbalor ti nasurok siyam a ribo a pisos, wallet a naglaon ti innem a ribo a pisos ken uppat a relo.
Inpalgak na nga awan met ti naldaw da a simrek ken patyen na nga iti likod a ridaw da ti nagnaan ti saan pay a nabigbig a suspek.
Dinakamat na a daytoy met ti ummuna a gundaway a napasamak kadakuada ti kastoy a pannakkaserrek ti pagtaengan da.
Kabayatanna, kinumpirmaran ni Mrs. Evelyn Mulato, kabsat ti agtagikua iti balay a natakawan iti Sitio 2 iti Barangay Tangid ditoy ciudad ti Laoag a karaman kadagiti intaray ti suspek ket gadgets ken sapatos ti anak na.
Segun kenni Mulato, itay alas-tres ti parbangon, nakapuot da gapo ta makatagari ti aso da ken idi bimmangon ti asawa na ket nakita da a nakalukaten ti tawa ti kwarta ti anak da.
Inlawlawag na nga idi napan da kinita ti salas ken kusina ket nakalukat amin a cabinet da.
Inbatad ni Molato nga screen laeng iti tawa ti inrikep ti anak na gapo ta baraen ken saan da a ninamnama a mapasamak daytoy kadakuada.
Gapo iti daytoy, patyen ni Mulato nga iti tawa iti kwarto ti anak da ti nagnaan ti saan pay a nabigbig a suspek gapo ta nagbatay pay ti tallo a nagtutuon a monoblock chair.
Mainaig iti daytoy, kunana nga idi kalmana, adda ti nakita da a nakamotorsiklo a kumitkita iti pagtaengan da isut gapo na a napan da inpreview ti CCTV iti barangay ken ditoy a naduktalan da nga adda ti maysa a lalaki a mangpicpicture iti pagtaengan da.
Malaksid iti daytoy, inbatad na pay a bayat ti panagbasketball dagiti annak da iti malem kalman ket adda ti nakita dagitoy a nakamotorsiklo nga agtamtambay iti asideg ti pagtaengan da.
